Baztango Irri dantza da. Bi dantzarik egiten zuten joku-dantza hau. Batek bizkarrean, gerrikotik zintzilik paper bat darama. Besteak gibeletik segitzen du eskuan kandela bat duela, papera erretzeko asmoz.
Bizkar dantzaren koreografia Baztango Ipurdi dantzaren bera da, baina azken honetan paper zerrenda bat eraman ordez, lasto maxoa eramaten da. Honatx Patxi Larraldek ematen duen azalpena, bi dantzetarako balio duena:
Dantzari batek, gerrontzearen gibeleko aldetik lotuta lasto edo belar idor maxo bat derama edo paper zerrenda luze bat. Dantzaria ttottoriko, jauzi eta itzuliak eginez dantzatzen da. Bertze dantzari batek, bere gibeletik gise berean dantzatuz eta eskuan kandela bat piztua daukela, egin ahal guziek egiten ditu lastoari su eman beharrez. Jokoa galtzen duena ardo erronda bat aterako du (Larralde & Larralde, 1991, 37)
Azalpen hau F. Arrarasek eman zuenaren oso antzekoa da (Arraras, 1987, 47). Aurretik Elena de Arizmendik eman zuen beste deskribapen bat:
La ejecutan ...irakurri gehiago
La ejecutan dos danzantes en cuclillas. Uno de ellos lleva un haz de paja echado a la espalda: el otro, con un tizón en la boca, entre saltos y giros, intenta prenderle fuego. Todo ello al son del txistu y sin perder el ritmo [Bi dantzarik egiten dute, kokoriko. Batek lasto sorta bat darama bizkarrean jarrita: bestea, ahoan ilinti bat duela, jauzi eta bira artean, su ematen saiatzen da. Hori guztia txistuaren doinuan eta erritmoa galdu gabe] (Arizmendi, 1968, 452)
Sinesgaitza ematen du ariketa hori, baina Arizmendi oin-ohar batean dio:
Sucedió en 1963. Me dijeron que esta danza era difícil y se iba perdiendo [1963an gertatu zen. Dantza hau zaila zela esan zidaten eta galtzen ari zela] (Arizmendi, 1968, 453)
Doinua, Larralderen arabera (Larralde & Larralde, 1991, 30) Antonio Elizalderengandik jaso zuen Aita Donostiak, hala nola Aita Olazanek, zeinak Bizker-dantza izenarekin argitaratu zuen (Larralde & Larralde, 1991, 31).
Egun, melodia erabiltzen da Ipurdi dantza egiteko. Itsas dantza egiteko erabiltzen zuen Maurizio Elizaldek (Donostia, 1994, 2003).
Doinuak bazuen bere erranairua:
Atso zarra milindrin
hire bentak egin din
ortzak ere guan zaizkin
eta sorgin zar bai idurin (Larralde & Larralde, 1991, 31)
